Array ( ) ახალი რუბრიკა, სადაც ჩვენს წარმატებულ მოსწავლეებს მოვუსმენთ, მოვიკითხავთ და მოვისიყვარულებთ Emsi.ge - შენი ავტოსკოლა - შენი მართვის მოწმობისთვის / It's your Driving School
შეცვალეთ ბილეთების ენა
 
 
ახალი რუბრიკა, სადაც ჩვენს წარმატებულ მოსწავლეებს მოვუსმენთ, მოვიკითხავთ და მოვისიყვარულებთ
მართა ბრავოს ბლოგიდან
თარიღი: 12-11-2019
1098
ნახვა
133

პირველ რიგში, დავიწყებ იმით, რომ ინტერვიუერობა ჩემთვის სრულიად ახალი ამპლუაა და აქ შემთხვევით აღმოვჩნდი. მე ის ვარ, ემსიში შემოსულებს მიმღებში რომ გხვდებით, ან ტელეფონზე გპასუხობთ, როცა პრაქტიკაზე ჩაწერა გინდათ.

ერთ-ერთი დატვირთული დღის შემდეგ, აივანზე მოსაწევად გასულს ჩვენმა ენერგიულმა და მუდმივად ახალი იდეებით სავსე დამფუძნებელმა, დათუნამ გამომიცხადა: „მოსწავლესთან ინტერვიუზე რას იტყვი, მართ?“ თავიდან ვერ მივხვდი რა იდეა უტრიალებდა თავში და ცოტა დავიბენი, მაგრამ დავთანხმდი. მოსწავლეც მოგიძებნე უკვეო, შევუთანხმდები დროზე და აბა, შენ იციო!

შერჩეული რესპონდენტი ანა ცეცხლაძე აღმოჩნდა. მახსოვდა ანა, ცოტა ხნის წინ გაიარა ჩვენთან კურსი და თან ისეთი გოგოა, ასი მოსწავლიდანაც რომ დაგამახსოვრდება.

როგორც გამოუცდელ ინტერვიუერს შეეფერება, შორიდან მოვუარე და თავისი საქმიანობის შესახებ ვკითხე. აღმოჩნდა, რომ ჰიპერმარკეტ „დომინოს“ ონლაინ გაყიდვების მენეჯერია. სამსახურის ადგილმდებარეობის გამო ვიფიქრე, ამისთვის უთუოდ სასიცოცხლო მნიშვნელობის იქნებოდა მართვის მოწმობის აღება, არიქა, ავშენდი-მეთქი. არც ვაციე, არც ვაცხელე და პირდაპირ ვკითხე:

- რა შეიცვალა თქვენს ცხოვრებაში მართვის მოწმობის აღების შემდეგ? - თუმცა, ისეთი პასუხი მივიღე, რომელსაც საერთოდ არ ველოდი.

- სიმართლე რომ გითხრათ, - მიპასუხა რესპონდენტმა - ჯერჯერობით, არაფერი შეცვლილა გარდა იმისა, რომ უფრო თავდაჯერებული გავხდი. წლებია ვგეგმავ, ვგეგმავ და საბოლოოდ ავიღე. უკვე ერთი თვე გავიდა და მართვის მოწმობა ჯერ არც გამომიტანია. ვფიქრობ, იმდენი ხანი მინდოდა, რომ ავიღე და გამოტანას არ ვჩქარობ. - ამ პასუხის მოსმენისას სიამაყე შემომეპარა და მომინდა ახლა ჩვენზე მეკითხა რამე.

- ჩვენს სკოლაზე რას იტყვით? რას შეადარებდით ჩვენთან მიღებულ გამოცდილებას?

- თქვენს სკოლაში გავლიე ჩემი შვებულების ერთი კვირა, ამიტომ, მოდი, უმჯობესია შედარებას არ გავაკეთებ, მაგრამ საოცრად პოზიტიურად მახსენდება, სკოლაში მოსვლის წინა დღით მიღებული შეტყობინებით დაწყებული, სწავლის ბოლო დღემდე, ყველაფერი. მიმღების გოგოებით დაწყებული, პრაქტიკის მასწავლებლებით დამთავრებული, მთელი კოლექტივი ძალიან პოზიტიურები არიან! - მადლობა გადავუხადე, ვუთხარი სწორედ ესაა ჩვენი მიზანი, რომ თავი კომფორტულად და მშვიდად იგრძნონ მოსწავლეებმა-მეთქი. - კი, თქვენი სკოლა ამიტომ ავირჩიე, - გააგრძელა რესპონდენტმა - ეს სკოლა თქვენი გუნდური ნამუშევარია. თავს ვადევნებდი თქვენს სიახლეებს, ვიდეო რგოლებს და გადავწყვიტე, სწორედ თქვენთვის მომენდო ჩემი სწავლა-განათლება. - აქ ჩემი სიამაყის დეტექტორი სულ გამოვიდა წყობიდან და ჩავეძიე:

- რომელი ვიდეო მოგეწონათ ყველაზე მეტად?

- ვიდეოს სახელად ჰქვია „დამშვიდდი“. ასე გაგიცანით. - გამეცინა. ეს უთუოდ გაახარებდა დათუნას. ამ ვიდეოს მთავარი გმირი ხომ თავადაა.

- აუცილებლად გადავცემ ჩვენს დამფუძნებელს, რომ ასე მოიხიბლეთ მისი ვიდეოთი.

- კი, განსაკუთრებით იმოქმედა ამ ვიდეომ, რადგან ჩემი თავი დავინახე. - ასე გაღიმებულმა დავასრულე ანასთან მოკლე ინტერვიუ.

 

რამდენიმე დღეში, როცა მიმღებში ვიჯექი და ბუზების თვლით ვიყავი დაკავებული, ანამ შემოაღო კარი. გამიკვირდა, რომ დავინახე. მართვის მოწმობა გამოვიტანე და არ შემეძლო არ შემომევლოო, ამიხსნა. საქმე არაფერი მქონდა, დავსხედით გარეთ და კარგა ხანს ვიბაასეთ. წასვლის წინ დამპირდა, კიდევ მოვალ, როგორც კი აქეთ აღმოვჩნდები და ცოტა დრო მექნებაო.

ახლა კი, უნდა დაგემშვიდობოთ მანამდე, სანამ ემსი ახალ მოსწავლეს ამოიღებს მიზანში და მისი სიყვარულის კორიანტელში გახვევას შეუდგება.

დატოვეთ კომენტარი

ვაჟა-ფშაველას 78ა
032 2 05 08 00
© ემსი დრაივი